Текебаевдин жактоочусу Канат Хасанов: "Прокурорлордун бири менин тууганым, мен ага ишенбейм"

Бишкек шаардык сотунда бүгүн, 5-сентябрда Өмүрбек Текебаев менен Дүйшөнкул Чотоновдун иши боюнча сот отуруму уланууда. Текебаевдин жактоочусу Канат Хасанов залда отурган мамлекеттик 3 айыптоочунун бири күйөө баласы экендигин айтып, ага ишенбөөчүлүк көрсөттү.

"Прокурор Таалай Айбашов менин кайненемдин агасынын күйөө баласы болот. Башкача айтканда, мага тууган болуп жатат. Ошондуктан ишенбөөчүлүк көрсөтөм", - деп өтүнүч келтирди. Бирок сот прокурорлордун каршылыгы менен өтүнүчтү четке какты.

Андан кийин Канат Хасанов жактоочулардын бири Чынара Жакупбекова баласын эмизүүгө кетип келбей жаткандыктан аны күтүп туруу өтүнүчүн келтирди. Хасанов зот залынан эле Жакупбековага байланышка чыкканда, ал баласы ооруп жугуштуу оорулар ооруканасында жүргөнүн айтты. Сот мындан улам отурумду бир саатка артка жылдырууну чечти.

Автор: Жамалидин Парманкулов