Кышында электр жарыгы маал-маалы менен өчүрүлөбү? Министрдин жообу

Кыш мезгилинде электр жарыгы маал-маалы менен өчүрүлбөйт. Бул тууралуу энергетика министри Доскул Бекмурзаев министрликтин жарым жылдык отчётун берип жатып билдирди.

Министр кыш мезгилине даярдыктар толук көрүлгөндүгүн жана андан ийгиликтүү өтүүнүн аракетинде экенин айтты.

"2022-жылдын 27-июлуна карата Токтогул суу сактагычындагы суунун көлөмү 12 миллиард 803 миллион метр кубду түздү. Токтогул суу сактагычынын суу ресурстарын сактоо жана 2022-2023-жылдарды ийгиликтүү өткөрүү максатында Бишкек ЖЭБинин жүгүн жайкысын 155 МВт, кышкысын 420 МВтка чейин жогорулатуу пландаштырылууда, жыл сайын электр энергиясын өндүрүү 2,5 миллиард кВт болот", - деп билдирди ал.

Бекмурзаев 2021-жылдын январь айынан баштап 2022-жылдын 1-июлуна чейин бөлүштүрүүчү компаниялар тарабынан 303 даана кошумча көмөкчордон орнотулганын, 477 даана трансформаторлор алмаштырылгандыгын жана 1247 чакырым электр чубалгылары орнотулуп, реконструкцияланганын кошумчалады.

Автор: Бек Оморбеков
Фото: Бек Оморбеков