Өкмөт: "Чек арадагы айылдарга бир канча социалдык объектилер курулат"

Министрлер кабинетинин төрагасы Акылбек Жапаров Баткен облусунун Капчыгай, Самаркандек жана Достук айылдарына барды. Бул тууралуу өкмөттүн маалымат кызматынан кабарлашты.

Кабарлангандай Жапаров Тажикстандын куралдуу агрессиясынын натыйжасында талкаланган турак-жай имараттарынын жана социалдык объектилердин курулушу менен таанышты.

"Ак-Сай айылында 275 орундуу мектеп, Капчыгай айылында 100 орундуу мектеп, Достук айылында 100 орундуу жалпы билим берүү мекемеси, фельдшердик-акушердик пункт, 30 орундуу бала бакча курулат. Социалдык объектилер АРИС долбоорунун алкагында курулат", - деп айтылат маалыматта.

Ал эми Самаркандек айылында курулушу башталган 75 орундуу оорукана 2023-жылдын жаз айларында пайдаланууга берилери күтүлүүдө.

Автор: Максуда Кудайбердиева