ТЕСТ: "Көчө" тасмасы тууралуу эмнелерди билесиз?

"Ээй, ээй аппагым! Сен менен өттү жаш чагым!". Бул ыр саптары жаңырганда ийинине электр зымдарын асынып алып, көчөнү жаңырта обон созуп келе жаткан "Көчө" тасмасындагы Аваздын образы эсиңизге келсе керек. Элеттиктердин күнүмдүк жашоосунан алынган өзгөчө окуялар менен көрүүчүнү күлкүгө бөлөгөн фильмди 1972-жылы режиссёр Геннадий Базаров тарткан. Андан бери жарым кылым убакыт өтсө да тасмадагы Унсун чоң эне, Туман аба, Борош аба, Ормотой шыбакчы, Нишан карыя, Сейил, Жалил, Аваз сыяктуу каармандар азыркыга чейин ар бир көрүүчүнүн жүрөгүндө сакталып келет.

"Бейиши болгур чоӊ атаӊ түшүмө кириптир. Өлөт окшойм. Сен мен үйрөткөн кошокту унута элексиңби? Кана жакшылап бир ыйлап, чоң энеңди кубантып койчу", - деген Унсун чоң эненин, "Сен өлүп тажабадың, мен көмүп тажабадым", - деген Аваздын сахнасы фильмдин эң эсте калган эпизоддорунун бири.

Анда келиңиз, сиз сүйгөн "Көчө" фильмин башынан эстеп, тасма тууралуу түзүлгөн тестке катышып көрүңүз! Кинонун канчасы эсибизде калганын сынайлы!