Бишкекте 2007, 2008-жылы туулган балдар адам тоноого шектелип кармалышты

Бишкекте жашы жете элек 2 өспүрүм адам тоноого шектелип кармалды. Бул тууралуу Ленин РИИБинен билдирди.

Маалыматка ылайык, 21-апрелде милицияга А.Ш. аттуу жаран арыз менен кайрылган. Арыз ээсинин айтымында, ошол эле күнү болжол менен саат 20:00 чамасында Манас проспектиси менен Ахунбаев көчөсүнүн кесилишинде белгисиз адамдар күч колдонуп, 17 миң сомдук Redmi 11С үлгүсүндөгү телефонун тартып алышкан.

Аталган факты боюнча Кылмыш-жаза кодексинин 206-беренесине (тоноо) ылайык кылмыш иши козголгон.

Шектүү катары 2007-жылы туулган Н.Н. жана 2008-жылы туулган К.Э. аттуу жарандар кармалып, убактылуу кармоочу жайга киргизилген.

Учурда тергөө иштери уланууда.

Автор: Кылымбек Бейшеев
Фото: Ленин РИИБ