Чүйдө айыл чарба жерлерин сатууга шектелип айыл өкмөттүн мурдагы башчысы кармалды

Чүй облусунун Аламүдүн районунда айыл чарба багытындагы жерлерди мыйзамсыз бөлүштүрүү жана сатууга шектелип, Васильев, азыркы А. Сыдыков айыл аймагынын мурдагы башчысы кармалды. Бул тууралуу облус милициясы кабарлады.

Маалыматка ылайык, 6-августта райондук администрация түзгөн комиссия Васильевка айыл аймагында текшерүү жүргүзгөн. Анын жүрүшүндө айдоо жана жайыт жерлерде мыйзамсыз курулуштар салынып, жер мыйзамдары бузулган фактылар аныкталган.

Бул боюнча Кылмыш-жаза кодексинин 212-беренеси («Айыл чарба жерлерин мыйзамсыз өздөштүрүү жана максаттуу багытын бузуу») боюнча козголгон.

Тергөө маалында буга чейин жергиликтүү кеңештин айрым депутаттары жана айыл өкмөтүнүн кызматкерлери да кармалган. 11-ноябрда 1967-жылы туулган мурдагы айыл өкмөт башчысы К.А. аталган ишке тиешеси бар деп табылып, кармалды.

Учурда ал убактылуу кармоочу жайга киргизилип, тергөө иштери уланууда.

Автор: Замира Ниязбекова