Экс-депутат Шайлообек Атазов үй камагына чыгарылды

Камакта отурган Жогору Кеңештин мурдагы депутаты Шайлообек Атазов үй камагына чыгарылды. Маалыматты Бишкектин Биринчи май райондук сотунун басма сөз кызматы ырастады.

Маалымдагандай, мындай чечимди райондук сот 2 күн мурун, тагыраагы, 24-январда чыгарып, мөөнөтүн 17-мартка чейин белгилеген. Атазовду үй камагына чыгаруу өтүнүчүн ИИМдин тергөөчүсү берген.

Атазов Кылмыш-жаза кодексинин "Кылмышка даярдык көрүү", "Кылмышка кошо катышуучулардын түрлөрү" жана "Массалык баш аламандыктар" беренелери боюнча айыпталууда.

Эске салсак, өткөн жылдын 22-ноябрында Жогорку Кеңешке шайлоодон кийин массалык баш аламандыктарды уюштурууну көздөгөн деген шек менен 10 адам кармалган. Алардын арасында "Социал-демократтар" партиясынын лидери Темирлан Султанбеков, Шайлообек Атазов, мурдагы президент Алмазбек Атамбаевдин уулу Кадыр Атамбаев да бар.

Кармалгандар 17-январга чейин камакка алынышкан. Январда алардын камактагы мөөнөтү 17-мартка чейин узартылганы маалым болгон.

Автор: Кылымбек Бейшеев
Фото: Интернеттен алынды