Санитардык талаптарды сактабагандарга айып пулду көтөрүүгө багытталган мыйзам долбоорун 2-окууда колдошту

Санитардык-гигиеналык талаптарды сактабагандарга айып пулдун көлөмү көтөрүлөт. Буга байланышкан мыйзам долбоорун Жогорку Кеңештин депутаттары 2-октябрда жактырышты. Депутат Дамира Ниязалиеванын айтымында, мыйзам долбоору акыркы учурларда республикада тамак-аштан уулануу, инфекциялык оорулар, ВИЧ жана башка илдеттер көбөйүп кеткендигинен улам сунушталууда. Мындай терс көрүнүштөр сапатсыз азык-түлүк жана ичүүчү сууну пайдалануунун, күбөлөндүрүүсү жок адамдарды ишке алуунун, санитардык-гигиеналык жана эпидемияга каршы талаптарды калктын ден соолугу үчүн потенциалдуу коркунуч туудурган ооруканалык манипуляциялардын аткарылышын сактабай коюудан келип чыгат. Ал эми азыркы учурда мамлекеттик айып пулдун орточо көлөмү 100 сомдон 2000 сомго чейин болсо, сунушталган мыйзам долбоорунда айып пулдун көлөмүн көтөрүү каралган. Айып пулдун көлөмүн жогорулатуу менен Коомдук саламаттык сактоо кызматынын ишмердигинин жоопкерчилиги күчөтүлмөкчү.

Автор: Жамалидин Парманкулов