Жылнаама

6- Ноябрь 1919 -жылы Партиялык жана мамлекеттик ишмер Турдакун Усубалиев туулган

Партиялык жана мамлекеттик ишмер Турдакун Усубалиев Кочкор районунун Кочкор айылында туулган. Кыргыз мамлекеттик педагогикалык институтту, Москвадагы мамлекеттик педагогикалык институтту жана Жогорку партиялык мектепти бүтүргөн. Орто мектепте мугалим, партиянын райкомунда бөлүм башчынын орун басары, Кыргызстан КП БКнын инструктору, КПСС БКнын жооптуу кызматчысы, "Советтик Кыргызстан" гезитинин редактору, партиянын Фрунзе шаардык комитетинин 1-катчысы, Кыргызстан КП БКнын 1-катчысы болуп иштеген. СССР жана Кыргыз ССР Жогорку Кеңешине 28 жыл бою депутат, 1995-жылдан тартып Кыргыз Республикасынын Жогорку Кеңешинин депутаты болгон.

Турдакун Усубалиев 24 жыл 5 ай 24 күн Кыргызстан коммунисттик партиясынын биринчи катчылык кызматын аткарып, бийлик мөөнөтүнүн узактыгы боюнча Бүткүлсоюздук рекорд койгон.

Турдакун Усубалиев 7 монографиянын, көптөгөн брошюлардын жана макалалардын, бир нече автобиографиялык китептердин автору. Ал "Манас-1", 4 Ленин, "Октябрь революциясы", 2 Эмгек Кызыл Туу ордендери жана көптөгөн медалдар менен сыйланган. Мамлекетке жана кыргыз элине кылган эң көрүнүктүү эмгеги үчүн 1999-жылы 80 жылдык мааракесине карата “Ак шумкар” өзгөчө белгиси тапшырылган, Кыргыз Республикасынын Баатыры деген эң жогорку артыкчылык даражасы берилген.

Турдакун Усубалиев 2015-жылдын 7-сентябрында 96 жаш курагында дүйнө салган.