Жылнаама

28- Сентябрь 1956 -жылы Америкалык авиаконструктор Уильям Боинг көз жумган

Америкалык авиаконструктор Уильям Боинг 74 жаш курагында жүрөк оорудан каза тапкан.

Дүйнөлүк авиацияга зор салым кошкон америкалык инженер Уильям Боинг 1881-жылы 1-октябрда машине куруу менен атагы чыккан АКШнын Мичиган штатындагы Детройт шаарында төрөлгөн. Йель университетин аяктаган соң ал атасы менен жыгач сатып иштейт. Лос-Анжелестеги авиаторлордун чогулушуна 1908-жылы катышкандан кийин ал аэроплан курууга баш-оту менен кирип кеткен.

Боинг досу Конрад Уэстервельд экөө B&W сууга конуучу жөнөкөй учакты үйүнүн жанында кураштырышат. Ал гидропланды алгач ирет учуруучу пилот кечигип, жаш Уильям Боингдин чыдамы кетип, учакты өзү асманга көтөрөт.

Америкалык конструктор 1916-жылдын 15-июлунда азыркы күнгө чейин атактуу “Боинг” компаниясын түптөгөн. Компания 12 жүргүнчүгө ылайык алгачкы учакты 1929-жылы учурган. Ошондон бери Уильям Боингдин компаниясы АКШнын гана эмес, дүйнөлүк авиациянын бирден бир лидери болуп саналат.

"Боинг" компаниясы учактардан тышкары ракета, чөлмөк, танк жана инженердик шаймандарды өндүрөт.