Бишкекте мамлекеттик кызматкерлерге иш кагаздарын кыргыз тилинде жүргүзүү үйрөтүлүүдө

Иш кагаздарын жүргүзүүнү мамлекеттик тилге өткөрүү боюнча өкмөттүн токтомун жана тийиштүү мыйзамды ишке ашыруу үчүн Мамлекеттик тил боюнча улуттук комиссиянын алдындагы Окуу-маалымат борбору мамлекеттик жана муниципалдык кызматкерлерди иш кагаздарды кыргыз тилинде жүргүзүүгө үйрөтүү үчүн семинар-тренинг уюштурууда. Бул тууралуу аталган мекемеден 2-мартта билдиришти.

Семинардын милдеттери – мамлекеттик жана муниципалдык кызматкерлерди иш-кагаздарын мамлекеттик тилде жүргүзүүгө окутуу;

– мамлекеттик жана муниципалдык кызматкерлерди кыргыз тилинде ченемдик-укуктук актыларды даярдоонун лингвистикалык-кодификациялык ченемдери менен тааныштыруу;

– тил үйрөтүүдөгү (угуу, окуу, жазуу, сүйлөө, которуу) негизги жөндөмдөрдү өнүктүрүүчү үлгүлөр менен тааныштыруу;

– мамлекеттик жана муниципалдык кызматкерлерге мамлекеттик тилди үйрөнүүдөгү жана котормо тажрыйбаларынан бөлүшүү, пикир алышуу, суроо-талаптарын билүү. Семинарга Бишкек шаарынын Октябрь, Биринчи Май, Ленин, Свердлов райондорунун мамлекеттик жана муниципалдык кызматкерлери, тил адистери чакырылганы айтылды.

Автор: Автандил Добулбеков