Москва шаарынын арбитраждык соту кыргыз өкмөтүн Кореянын Ли Жон Бэк аттуу жаранына 22,5 миллион доллар төлөтүп берүү боюнча чечимди жокко чыгарды

Москва шаарынын арбитраждык соту кыргыз өкмөтүн Түштүк Кореянын ишкери, “Борбор азиялык корпорациянын” жетекчиси Ли Жон Бэкке 22,5 миллион доллар төлөтүп берүү боюнча Москванын Соода-өнөр жай палатасынын алдындагы арбитраждык сотунун 2013-жылдагы чечимин жокко чыгарды. Мындай чечимди Москва шаардык соту кечээ, 6-майда кабыл алганын өкмөттөн билдиришти.

Эгерде экинчи тарап арызданбаса, соттун өкүмү мыйзамдуу күчүнө 30 күндөн кийин кирет.

Айта кетсек, Ли Жон Бэкке 2013-жылдын 13-ноябрында Бишкек эркин экономикалык аймагынын жетекчилиги тарабынан ага 93 жылга ижарага берилген 18 гектар жер кайра тартылып алынганы боюнча доо коюп, Москвадагы Соода-өнөр жай палатасынын алдындагы арбитражга берип, утуп алган. Арбитраж кыргыз өкмөтүн түштүк кореялык ишкердин пайдасына 22,5 миллион доллар төлөп берүүгө милдеттендирген. Ага ылайык, өкмөт аталган сумманы төлөп бериши керек болчу, бирок өкмөт бул чечимге макул болбой, Москва шаарынын арбитраждык сотуна кайрылган.

Автор: Жамалидин Парманкулов