Таиланддык инвесторлор кыргыз мамлекетинен баалуу таш казууга кызыгышууда

Геология жана минералдык ресурстар агенттигинин башчысынын орун басары Улан Рыскулов 12-майда Таиланддан келген делегация менен жолугушту. Делегацияны Таиланддын инвестиция боюнча кеңешине караштуу Инвестиция боюнча департаментинин аткаруучу директору Чолада Ариражакул жетектеп келгенин мекемеден билдиришти. Иш сапардын максаты - кыргыз мамлекетиндеги инвестициялык климат менен таанышуу.

Таиланддык өкүлдөр кыргыз мамлекетинен баалуу таш казуу тармагына кызыкдар экендиктерин билдиришти. Рыскулов өлкөгө инвестор тартуу маанилүүлүгүн белгилеп: "Кыргыз мамлекетин туруктуу өнүктүрүү стратегиясы боюнча жана өлкөдө тоо-кен өндүрүшүн өнүктүрүү стратегиясына ылайык, республикабызга инвестиция тартуу негизги приоритет",- деп билдирди.

Автор: Автандил Добулбеков