Жайдын 1 айы артта калса да, Ысык-Көлдө эс алган адамдардын саны арта элек (фоторепортаж)

Жай мезгилинин биринчи айы аяктап бара жатса да, Ысык-Көлдө эс алган адамдардын саны жокко эсе. Көлгө бирин-серин келип түшкөндөр жээктин ээн экенине сүйүнүп, жылып калган сууга чумкуп алышууда. Ал арада пансионаттардын ээлери мындай туристтик маанайды көрүп көңүлдөрү чөгөт.

Чолпон-Ата шаарында жайгашкан ден соолукту чыңдоочу жайлардын биринин директору Жеңиш Мукамбетовдун айтымында, жайкы сезон июндун башында ачылганы менен, туристтер эс алууга июль айынын ортолорунан баштап келе баштайт.

“Учурда Ысык-Көлдө адаттагыдан жамгырлуу жана шамал күндөр көп болгондуктан, биз быйылкы сезондун начар болуп калышынан коркуп турабыз. Бүгүнкү күндө көлгө келип эс алгандар өтө аз, жок десе болот. Жылда активдүү эс алуу июлдун 15инен кийин башталып, ошону менен 25-августка барып аяктайт”,- деди Мукамбетов.

Айта кетсек, Ысык-Көл облусунда жалпысынан 180ге жакын эс алуучу жай бар. Алардын 150сү Ысык-Көл районунда жайгашкан. Жыл сайын орто эсеп менен бул пансионаттарга миллионго жакын турист келет.

Автор: Наргиза Бекжанова
Фото: Наргиза Бекжанова