Өкмөттө мектептерди куруу боюнча кеңешме өттү

Бүгүн, 7-октябрда өкмөт башчы Темир Сариев тийиштүү түзүм жетекчилери менен билим берүү мекемелеринин курулушунун жүрүшүн талкуулады. Бул тууралуу өкмөттүк аппараттан кабарлашты. Кеңешменин жүрүшүндө белгиленгендей, жыл башында 25 мектептин курулушу пландаштырылган, бирок өкмөт башчы бул көрсөткүчтү 70ке дейре жеткирүүнү тапшырган.
"Жыл аягына чейин биз 70 билим берүү мекемесин, анын катарында спорттук залдарды да ишке беребиз. "Капиталдык салым" эсебинен 50 мектеп курулса, ал эми түрк насыясынын эсебинен 20 мектеп курулган. Мындан тышкары Талас шаарында таланттуу балдар үчүн мектептин курулушун баштоо зарыл, анда окуу процесси үчүн зарыл болгон бардык шарттар: компьютердик класстар, спортзалдар, ашкана, жатаканалар каралышы кажет. Бул мектепте Талас облусунун булуң-бурчунан келген балдар билим алуусу тийиш",- деп маалымдады премьер-министр.
Темир Сариев белгилегендей, билим берүү мекемелеринин курулушу өлкө президентинин жана жалпы коом көзөмөлүндө турат. Буга байланыштуу өкмөт башталган ишти өз мөөнөтүндө бүткөрүүсү зарыл.
Архитектура, курулуш жана турак жай-коммуналдык чарбасы мамлекеттик агенттигинин маалыматына ылайык, үстүбүздөгү жылдын 1-сентябрына карата 26 мектептин курулушу жыйынтыкталып, ал эми 1-октябрга карата 7 мектеп бүткөрүлүп, ишке берилген, ал эми октябрь айында 24 жалпы билим берүү мекемесинин курулушу аяктайт.
Мамлекеттик агенттиктин айтымында, 2015-жылдын ноябрь айында 14 мектептин курулушун жыйынтыктоо пландаштырылууда, декабрь айында республикалык бюджеттин эсебинен курулган 6 мектеп эксплуатацияга берилет. Бүткөрүлө турган мектептердин жалпы саны 70ти түзөт. Аталган объектилерге "капиталдык салым” беренеси боюнча 1 миллиард 645 миң 77,5 сом бөлүнгөн. Түрк кредитинин линиясы боюнча 235 миллион 188 000 сом бөлүнгөн. Өкмөт тараптан быйыл “Жер-Үй” кенинен түшкөн каражатты 100 мектепти реконструкциялоого, оңдоого жана 100 жаңы мектепти салууга багыттоо пландаштырылган.

Автор: Жамалидин Парманкулов