Беларустагы шайлоодо бешинчи жолу президенттикке аттанган Александр Лукашенко жеңишке жетти

Алдын ала маалыматтар боюнча, Беларуста өткөн президенттик шайлоодо Александр Лукашенко 83,49 пайыз добушка ээ болуп, жеңишке жетти. Маалыматты аталган өлкөнүн Борбордук шайлоо комиссиясынын төрайымы Лидия Ермошинага шилтеме берип 12-октябрда чет элдик басылмалар жазып чыгышты.

Баарына каршы добуш бергендер 6,4 пайызды түзгөн. Лукашенконун атаандаштарынан "Чындыкты сүйлө" жарандык кампаниясынын өкүлү 4,42 пайыз, Либерал-демократиялык партиянын лидери Сергей Гайдукевич 3,32 пайыз, "Беларусь" патриоттук партиясынын төрагасы Николай Улахович 1,67 пайыз добушка ээ болду.

БШКнын маалыматына караганда, жарандардын 87,2 пайызы добуш беришкен. "Шайлоонун акыркы жыйынтыгы 16-октябрда белгилүү болот",- дейт Ермошина.

61 жаштагы Александр Лукашенко мамлекет башчы болуп бешинчи жолу шайланып жатат. 1994-жылы президенттик шайлоонун 2-турунда 80,3 пайыз добуш менен Лукашенко президент болуп шайланган. 1996-жылы анын ыйгарым укуктары референдум аркылуу 2001-жылга чейин узартылган. Андан кийин 2001, 2006 жана 2010-жылдары өлкөнү башкарган.

Автор: Айпери Ганыжан кызы