Абактан качкан кылмышкерлерди издөө улантылып жатат

Абактан качкан кылмышкерлерди издөө улантылып жатат. Ички иштер министрлигинин басма сөз кызматынан SUPER.KG'ге 20-октябрда билдиришкендей, издөө иштери азырынча натыйжа бере элек. Тинтүү Бишкектин түндүк тарабындагы жаңы конуштарда улантылып, ага 1000дей милиция тартылган.

Эске салсак, 11-октябрдан 12-октябрга караган түнү Чүй облусунун Төмөнкү-Нооруз айылындагы №50-түзөтүү колониясынан 9 кылмышкер качып кетүүгө аракет жасаган. Жол-кайгуул кызматынын инспекторлору тарабынан 5 кылмышкер колго түшүрүлгөн, дагы 3 кылмышкер изделип жатат. Кылмышкерлер абактын кызматкерлерин муунтуп өлтүрүп чыгып кетишкен. Алардын колунан 3 кызматкер жан берсе, бири оор жаракат алган.

Абактан качкан кылмышкерлерди издөө иштери өткөн аптада Дордой, Эне-Сай конуштарында жүргүзүлгөн. Алардын бири Данияр Кадыралиев 16-октябрда түшкө маал Дордой конушунда өлтүрүлгөн.

№50-абактан качкан кылмышкерлер тууралуу маалымат үчүн ИИМ 1 миллион сом сыйлык жарыялады.

Автор: Жамалидин Парманкулов