Былтыр Мамлекеттик салык кызматынын маалымат борборуна 52 миңден ашык салык төлөөчү кайрылган

2015-жылы Мамлекеттик салык кызматынын маалымат борборуна 52 746 салык төлөөчү кайрылган. Муну бүгүн, 15-февралда аталган мекемеден билдиришти.

Маалым болгондой, бул көрсөткүч 2014-жылга салыштырмалуу 17 123 чалууга, ал эми 2013-жылга салыштырмалуу 33 434 кайрылууга көп.

2015-жылдын биринчи жарым жылдыгындагы жүргүзүлгөн талдоо көрсөткөндөй, салык төлөөчүлөрдүн кайрылууларынын эң жогорку чеги бирдиктүү салык декларациясын, мүлк жана жер салыгы боюнча маалыматтык эсеп-төлөөлөрдү толтуруу жана тапшыруу маселелери боюнча декларациялык кампанияны өткөрүү, ошондой эле кыймылдуу жана кыймылсыз мүлк салыгын төлөө мезгилине туш келди.

2015-жылдын биринчи жарым жылдыгында салык төлөөчүлөрдүн телефон чалууларынын чукул көбөйүшү Кыргыз Республикасы Евразиялык экономикалык биримдигине киришине жана мунун алкагында КРнын салык мыйзамдарындагы кабыл алынган өзгөртүүлөргө жана толуктоолорго байланыштуу болду.

Ошондой эле салык төлөөчүлөрдүн көпчүлүгүн алар тарабынан салык карызын жана учурдагы салыктык төлөмдөрүн төлөө учурунда эсептелген пайыздарды, туумдарды, салык санкцияларын эсептен чыгаруу маселелери кызыктырды.

Автор: Наргиза Бекжанова