42 миңден ашык салык төлөөчү бирдиктүү салык декларациясын тапшырды

15-февралга карата 42 783 салык төлөөчү: анын ичинен 7723 юридикалык жактар, 20 125 жеке ишкерлер жана 14 935 жеке жактар бирдиктүү салык декларациясын тапшырды. Бул тууралуу бүгүн, 16-февралда Мамлекеттик салык кызматынын басма сөз кызматынан билдиришти.

1-мартка чейин юридикалык жактар, 1-апрелге чейин жеке жактар 2015-жылы алынган кирешелер же жер тилкелери жана мүлк объектилери, экономикалык ишмердиктери тууралуу жана башка маалыматтар жөнүндө салык органдарына отчёт берүүлөрү керек.

Үстүбүздөгү жылдын 1-мартына чейин ата мекендик уюмдар, дыйкан жана фермердик чарбалар, туруктуу мекемесин түзүү менен Кыргыз Республикасынын аймагында ишмердигин ишке ашырган чет өлкөлүк уюмдар бирдиктүү салык декларациясын берүүгө милдеттүү.

1-апрелге чейин мамлекеттик кызматкерлер, жеке ишкерлер (анын ичинде патенттик негизде салык төлөгөндөр), кыймылдуу (транспорт) жана кыймылсыз (батир жана үй) мүлкү жана жер тилкеси (короо-жай тилкелеринен башка) бар жеке жактар, юридикалык жакты түзбөй туруп ишмердиктерин ишке ашырышкан дыйкан жана фермердик чарбалар бирдиктүү салык декларациясын берүүгө милдеттүү.

Декларацияны өз убагында тапшырбаган жеке жактарга 2000 сом жана юридикалык жактарга 5000 сом өлчөмүндө административдик айып салынат.

Автор: Наргиза Бекжанова