Президенттин катышуусундагы ишембиликте жол эрежесин бузган депутат Анвар Артыковго 1000 сом айып пул салынды

Парламенттин КСДП фракциясынан депутаты Анвар Артыковго карата түзүлгөн протокол

Парламенттин КСДП фракциясынан депутаты Анвар Артыковдун айдоочулук күбөлүгү

Депутат Анвар Артыков

12-мартта Бишкек шаарында Ботаникалык сейил багында президент Алмазбек Атамбаевдин катышуусундагы ишембиликте жол эрежесин бузган КСДПдан ЖКнын депутаты Анвар Артыковго айып пул салынды. Бул тууралуу SUPER.KG порталына айып пул салган Жол-кайгуул милициясынын инспектору билдирди.

Анын айтымында, саат 12:00 чамасында аталган депутат автоунаасын токтотууга тыюу салынган жерге токтотуп койгон. "Депутат айдоочулук күбөлүгүн берип, унаасын айдап кетип калган. Ага карата протокол түзүлүп, мыйзамга ылайык, 1000 сом айып пул салынды",- деди инспектор.

Эскерте кетсек, 12-мартта Бишкек шаарындагы Ботаникалык сейил багында ишембилик өткөн. Анда президент Алмазбек Атамбаев, премьер-министр Темир Сариев, Жогорку Кеңештин төрагасы Асылбек Жээнбеков, депутаттар, өкмөт аппаратынын, президенттик администрациянын, парламенттин аппаратынын кызматкерлери катышышкан. Жалпысынан иш-чарага 500гө жакын адам келген. Ишембиликте көчөттөр отургузулуп, тазалоо иштери жүргүзүлгөн.

Автор: Нургазы Аматов
Фото: Нургазы Аматов