Бүгүн, 25-мартта Ош шаарынын №2-Достук аймактык кеңешинде 100 орундуу №13-“Кыял” балдар бакчасынын ачылыш аземи болду. Бул тууралуу шаардык мэриянын басма сөз кызматы билдирди. Маалым болгондой, иш-чарага Ош шаарынын мэри Айтмамат Кадырбаев, шаардык кеңештин депутаттары, мекеме-ишканалардын жетекчилери, жергиликтүү тургундар жана бөбөктөр катышты.
Шаар мэри бала бакчаларды курууга, алардын материалдык-техникалык, окуу-усулдук базасын чыңдоого өзгөчө басым жасалып жатканын билдирди.
“Аталган бала бакча 1920-жылдары курулган байдын үйү болгон экен. Үйдү 1937-жылдан бери бала бакчага ыңгайлаштырып пайдаланып келишкен. Ошондон улам бул имараттын шартын иликтеп, өткөн жылы бала бакчаны бузуп, анын ордуна жаңы, бүгүнкү күндүн талабына жооп берген бакча куруу чечимине келгенбиз. Кыска мөөнөттө, башкача айтканда, 9 айдын ичинде куруп бүтүрүп, бөбөктөрүбүзгө тартуулап жатабыз. Бүгүн ачылып жаткан жаңы бала бакчаны кошкондо соңку жылдарда 4 бала бакча курулуп, пайдаланууга берилди жана мурда жабылып калган 4 бала бакчаны кайрадан калыбына келтирүүгө жетиштик. Апрель-май айларында дагы 2 бакчанын курулушу аяктайт. Жылдын аягына чейин дагы 2 бала бакча куруунун үстүндө иштеп жатабыз”,- деди Кадырбаев.
Иш-чаранын негизинде калаа башчысы бала бакчаны курууга активдүү катышкандарга Ош шаарынын мэриясынын Ардак грамоталарын жана бакчанын бөбөктөрүнө эстелик белектерин тапшырды.
Бакчанын курулуш иштери 2015-жылдын июнь айында башталып, толугу менен жергиликтүү бюджеттен каржыланды. Жалпы сметалык баасы 35 миллион сомду, тендердик баасы 22 миллион сомду түзөт.
Эске салсак, 23-март күнү Ош шаарынын Жапалак айылдык аймактык башкармалыгына караштуу Гүлбаар-Төлөйкөн айылында 180 орундуу балдар бакчасы пайдаланууга берилген.
Учурда Ош шаарында 31 мамлекеттик, 22 менчик балдар бакчасы бар.
