Жогорку Кеңештин комитети спикерликке Исхак Масалиевдин талапкерлигин жактырды

Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинин 27-апрелдеги жыйынында парламенттин төрагасы кызматына "Өнүгүү-Прогресс" фракциясынын депутаты Исхак Масалиевдин талапкерлиги бир добуштан жактырылды. Депутаттардын сунушу менен бул маселе талкуусуз өттү.

Эми Жогорку Кеңештин бүгүнкү жалпы жыйынында төраганы шайлоо өтүп, анда Исхак Масалиев менен КСДП лидери Чыныбай Турсунбеков ат салышат.

Эскерте кетсек, 20-апрелде Жогорку Кеңештин төрагалыгына шайлоо өтүп, талапкерлер: "Кыргызстан" фракциясынын лидери Канат Исаев жана "Өнүгүү-Прогресс" фракциясынын лидери Бакыт Төрөбаев 51:51ден бирдей добуш алышкан. Мындан улам жаңы талапкерлер менен жаңы шайлоо өткөрүү жарыяланган.

22-апрелде КСДП фракциясы Ч.Турсунбековдун спикерликке талапкерлигин коюуну бир добуштан жактырган. Мындан тышкары анын талапкерлигин колдой турганын "Ата Мекендин", "Республика - Ата Журттун" жана "Бир болдун" лидерлери айтышкан.

Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитети кечээ парламенттин төрагасы кызматына КСДПнын лидери Чыныбай Турсунбековдун талапкерлигин бир добуштан жактырган.

Автор: Нургазы Аматов