Жогорку Кеңештин экс-депутаты Садыр Жапаровдун уулу Рустамга кылмыш иши козголду, учурда ал убактылуу кармоочу жайда. Бул тууралуу SUPER.KG порталына саясатчынын жубайы Айгүл Жапарова билдирди.
Анын айтымында, учурда Рустамдын ден соолугу жакшы, бирок ал шок абалда. "Рустамды 4-ооруканага алып барып, УЗИге көрсөтпөй чыгарып коюшту. Акыйкатчынын өкүлдөрүн, адвокаттарын киргизишкен эмес. Анын денесинде көк алалар бар эле", - деди Жапарова.
Мындан тышкары ал Садыр Жапаровдун экинчи баласы тууралуу айтып берди. "Ринат Садырдын бир тууганынын баласы. Ринаттын атасы, апасы жол кырсыгынан каза болуп, Садыр аны багып алган. Сот Ринатты 5 суткага камакка алуу боюнча чечим чыгарды", - деп билдирди Жапаровдун жубайы.
Айта кетсек, УКМКнын алдындагы митингде кармалгандардын 12сине кылмыш иши козголгонун ИИМ билдирген. Маалыматка караганда аталган митингде жалпы 105 адам кармалып, Биринчи Май райондук ички иштер башкармалыгына жеткирилген. Алардын ичинен 64 адам 2 суткадан 5 суткага чейин убактылуу кармоочу жайга киргизилген. Ошондой эле 12 адамга административдик айып салынып, 2 адамга эскертүү берилген. Калгандары менен профилактикалык иш-чаралар жүргүзүлгөн.
Митинг учурунда 5 милиция кызматкери жабыркаган.
Ички иштер министрлиги тергөөнүн кызыкчылыгы үчүн кылмыш иши козголгон 12 адамдын аты-жөнүн айткан жок.