Мурдагы акыйкатчы Турсунбек Акунга 1500 сом айып салынып, 8 саат коомдук жумушка тартуу чечими чыгарылды. Бул тууралуу маалыматты SUPER.KG порталына Бишкек шаарынын Биринчи Май райондук сотунан тастыкташты.
Ал эми Турсунбек Акунга байланышканыбызда, болгону ага 1500 сом айып салынганын айтты.
"Мен бул чечим боюнча жогорку инстанциядагы сотторго кайрылам. Анткени мен тартип бузган жокмун. Болгону ал жакта укук коргоочу катары жүрдүм", - дейт Турсунбек Акун.
Айта кетсек, 25-март күнү мурунку депутат Садыр Жапаровдун тарапташтары УКМКнын алдына барышып, Жапаровду бошотууну талап кылышкан. Кийин милиция тарапка таш ыргытылып, чуу чыккан соң чогулгандар күч менен таратылган. Милиция кызматкерлери тарабынан жалпы 105 адам кармалып, алардын ичинен 64 адам 2 суткадан 5 суткага чейин убактылуу кармоочу жайга киргизилген. Ошондой эле 12 адамга административдик айып салынып, 2 адамга эскертүү берилген. Калгандары менен профилактикалык иш-чаралар жүргүзүлгөн.
УКМКнын алдындагы митингде мурдагы акыйкатчы Турсунбек Акун дагы бар болчу. Аны милиция кызматкерлери ошол жерден кармап кетишкен.