ЖЫЛНААМА, 4-АПРЕЛЬ: 68 жыл мурун Вашингтондо Түндүк атлантикалык келишимге кол коюлуп, НАТО түзүлгөн

Мындан 68 жыл мурун, 1949-жылы 4-апрелде Вашингтон шаарында Америка Кошмо Штаттары, Бельгия, Британия, Голландия, Дания, Исландия, Италия, Канада, Люксембург, Норвегия, Португалия жана Франция мамлекеттери Түндүк атлантикалык келишимге кол коюшкан. Ошентип НАТО согуштук уюму куралган. НАТОго 1952-жылы Греция менен Түркия, 1955-жылы Германия Федеративдик Республикасы, 1982-жылы Испания, 1999-жылы Венгрия, Польша жана Чехия, 2004-жылы Болгария, Латвия, Литва, Румыния, Словакия, Словения, Эстония өлкөлөрү мүчөлүккө кабыл алынган.

НАТО - North Atlantic Treaty Organization деп чечмеленип, кыргызча Түндүк Атлантика Келишим Уюму дегенди түшүндүрөт.

Кыргыз Республикасы менен НАТО "Тынчтык үчүн өнөктөштүк" программасынын алкагында 1994-жылдан бери кызматташууда. Документтер боюнча тараптар коопсуздук, тынчтыкты орнотуу ишмердүүлүгү, чек ара коопсуздугу, террорчулукка каршы күрөшүү жаатында кызматташып келишет. 2007-жылы Кыргыз мамлекети НАТОнун Пландоо жана талдоо процесси программасына кошулган. Бул программа куралдуу күчтөрдү реформалоо, аскерлерди даярдоого багытталган.

4-апрелге карата жылнаама.

Автор: Саадат Токтоболот кызы