Экс-депутат Садыр Жапаровдун ден соолугу жакшы. Бул тууралуу Жазаларды аткаруу мамлекеттик кызматы билдирип, Жапаровду видеого тартып коомчулукка жарыялады.
Видеодо Жапаров ЖАМКнын кызматкерлерине нааразычылыгы жок экенин билдирип, эмне үчүн колу жана моюнун кескени тууралуу айтат.
"Менин ден соолугум жакшы. Мен үчүн кабатыр болбогула. Азыр 2 күзөтчү кайтарып отурат. Бул жердеги кызматкерлерге эч кандай нааразычылык жок", - деген экс-депутат. Ал эми эмне үчүн мындай кадамга барганы тууралуу "мен шок абалда болчумун, колума бычак алып өзүмдү кескилегенимди билем. Андан башкасы эсимде жок. Ойгонсом ооруканада экенмин" дейт. Ошондой эле ал кандай кырдаал болбосун мыйзамдуулук сакталсын деген оюн билдирди.
Белгилей кетсек, бүгүн, 4-апрелде Жапаровдун моюну жана колу кесилип, эсин жоготкон абалда жаткан сүрөтү жарыяланып, коомчулукта, социалдык тармактарда кызуу талкууну жараткан.