"Замандаш" партиясы Сооронбай Жээнбековду Кыргыз Республикасынын президенттигине талапкер катары колдойт

Бүгүн, 26-июлда "Замандаш" партиясы республикалык конференция өткөрүп, анда алдыдагы шайлоодо Сооронбай Жээнбековдун Кыргыз Республикасынын президенттигине талапкерлигин колдой турганын билдирди.

Ɵз сөзүндө "Замандаш" партиясынын тең төрагасы Жеңиш Молдокматов Кыргызстанда алгачкы жолу реалдуу альтернативдик негизде өлкө башчысы шайланганы жатканын айтты. "Өлкөгө коомдогу туруктуулукту сактап, улантуучу, Апрель революциясынан кийин багытын тастыктап, экономикалык өнүгүүгө жетишүү үчүн мамлекеттеги бардык саясий жана коомдук күчтөрдү бириктире алган адам керек болуп турат", - деди ал.

Ошондой эле Ж.Молдокматов «Замандаш» партиясынын 22-июлдагы саясий кеңешинин жыйынында алдыдагы шайлоодо Сооронбай Жээнбековдун талапкерлигин колдоо чечими кабыл алынганын белгилеп өттү.

Мындан сырткары, Жеңиш Молдокматов учурдагы өкмөттүн башчысы Сооронбай Жээнбеков талапкерлердин ичинен эң эле ылайыктуусу экенин билдирди.

Республиканын конференциянын соңунда партиянын саясий кеңешинин чечими 102 делегаттын кароосуна коюп, делегаттардын баары бир добуштан колдоого алышты.