Президенттик шайлоодо өлкөдөгү добуш берүү тилкелери саат 20:00дө жабылды. Президенттикке талапкерлердин бири Адахан Мадумаровдун штабында болуп, шайлоонун жүрүшү тууралуу оюн уктук.
Анын айтымында, ал Орусиянын шайлоо тилкелери жабылган айрым шаарларында жана айрым чет мамлекеттердеги добуштардын жыйынтыгы боюнча алдынкы тизмеде келе жатат.
Борбордук шайлоо комиссиясынын алдын ала жыйынтыктары боюнча, ал алдынкы үчтүккө кирген:
Сооронбай Жээнбеков — 901 миң 575 добуш (54,73 пайыз);
Өмүрбек Бабанов — 557 миң 227 добуш (33,83 пайыз);
Адахан Мадумаров — 106 миң 422 добуш (6,46 пайыз).
"Шайлоонун жыйынтыгы логикалык күтүүгө жатпайт. Себеби, биринчиден, кол санактар келүү керек. Экинчиден, алдын ала бир санды айтып коёт да, анан анын артынан кууп жөнөшөт. Азыр тынчтык болуп турганы менен эртең кагаздар келип баштаганда суроолор пайда болушу мүмкүн. Шайлоо кандай өткөнүн байкап, көрүп турдук. Кайгырып калуу жок. Бул күрөш бүттү, эртең жаңы күрөш башталат. Биринчи жолу жеңилип жаткан жокпуз, ага ызылдап жаткан жокпуз. Бир гана өкүнүчтүүсү туура, так, адилеттүү күрөштө жеңилсең башка. Билип турасың да кандай ыплас иштерге барышканын. Ар бир нерсенин акыры болот. Бир жаман нерсенин эшиги жабылса, жакшы нерсенин 10 эшиги ачылат. Мен кайра айтам, бул күрөш бүттү, эми жаңы күрөш башталат", - деди Мадумаров.