Орус телекөрүүчүлөрү сапаттуу тасмаларды көрүүгө жана мыкты актёрлук курамга татыктуу эмес. Мындай билдирүүнү орусиялык белгилүү актёр Дмитрий Дюжев телеканалдардын бирине берген маеги учурунда айткан.
Маалым болгондой, актёр жакында эле аэропортто эл менен чогуу кезек күтүп турган. Жүргүнчүлөрдүн баары эконом класс менен уча турганын билген соң бизнес класс менен уча турган Дюжев кезек күтпөстөн өз ордуна барып отура берүүнү чечкен. Бирок жүргүнчүлөр аны өткөрбөй коюшкан. Бул көрүнүш актёрду капа кылган.
"Мен эл үчүн жашоомду курмандыкка чалып, мыкты образдарды тартуулаганга аракет кылып жүрүп, жыйынтыгында ушундай орой мамилеге кабылдым. Көрсө азыр эл үчүн арзан, эптемей сериалдар чыгып жатканы туура экен. Алар ушундайга татыктуу", - деген ал.
Дмитрий Дюжев - актёр жана режиссёр. Ал "Бригада" сериалы, "Арал", "Кука" жана башка тасмалардагы ролдору аркылуу таанымал.