Европадагы эң ири футболдук лига - Чемпиондор Лигасында тайпалык баскычтан чыгуу үчүн таймаштар уланууда. 21-ноябрдан 22-ноябрга караган түнү 5-турдун оюндары орун алып, анда “АПОЭЛ” футболдук клубу өз талаасында “Реал Мадрид” клубун тосуп алды. Оюндун жүрүшүндө “конок койдон жоош” болгон жок. Зинедин Зидандын шакирттери оюндун алгачкы 45 мүнөттүк бөлүгүндө эле атаандаштарынын дарбазасына 4 топ киргизди. Лука Модрич 23-мүнөттө, Начо 41-мүнөттө, ал эми Карим Бензема 39-мүнөттө жана биринчи бөлүккө кошулган 1 мүнөттүктө айырмаланышты. Беттештин экинчи бөлүгүндө талаанын кожоюндары өз дарбазасын сактоого жакшы эле жан үрөштү. Бирок “Реал Мадриддин” башкы бомбардири Криштиану Роналду 49-мүнөттө жана 54-мүнөттө таамай болуп чыгып, командасынын ири эсеп менен утуусуна салым кошту. Ошентип жоопсуз 6 топтун арты менен падышалык команда плей-офф баскычына чыгууга мүмкүнчүлүк алды.
Мындан тышкары плей-офф баскычына чыгууну “ПСЖ”, “Бавария”, “Манчестер Сити”, “Тоттенхэм” жана “Бешикташ” клубдары камсыздашты.