Кыргыздын залкар ырчы, обончусу Чубак Сатаевдин айкели тургузулду. Бул тууралуу SUPER.KG порталына анын уулу, белгилүү ырчы Кубаныч Сатаев билдирди.
Маалым болгондой, эстеликтин ачылышы келе жаткан жылдын жаз айларына белгиленген.
"Учурда өзүбүз туулуп-өскөн Бакай-Ата районунун Боо-Терек айылында аталган айыл өкмөтүнүн сунушу менен атамдын эстелиги тургузулду. Буга чейин айылдагы клубдардын бирине да анын аты берилген. Жакынкы күндөрү ошол клубдун ичине сүрөттөрүн коюп, чакан музей ачууну пландап жатабыз. Андан сырткары мал союп, калың элди чакырып жогорку деңгээлде ачылышын өткөрсөк деген ниетибиз бар. Бирок ага бир аз убакыт керек болгондуктан, келе жаткан жылдын жаз айларында ишке ашат деп турабыз", - деди ырчы.
Белгилей кетсек, Чубак Сатаев 1960-жылы 13-январда Талас облусунун Боо-Терек айылында туулган. Анын “Арман, ай”, “Кайгырбачы, кан досум” “Кең дүйнө”, “Ак бата” ырлары убагында хит болуп, азыркыга чейин популярдуулугун жогото элек. Ал 1993-жылы капысынан дүйнө менен кош айтышкан. Тактап айтканда, концерттен соң сахнанын артына өтүп, башын мыкчып, “кежигем тырышып жатат” деген боюнча жыгылып калган. Жандандыруу бөлүмүндө 2 күн жатып көз жумган. Дарыгерлердин айтуусунда, мээсине кан куюлуп кеткен.