Президент Жээнбеков Кытайга учуп кетти

Президент Сооронбай Жээнбеков бүгүн, 6-июнда мамлекеттик визит менен Кытайга учуп кетти. Бул тууралуу президенттик аппараттан кабарлашты.

Сапар алкагында президент Кытай Эл Республикасынын төрагасы Си Цзиньпин, КЭР Мамлекеттик кеңешинин премьери Ли Кэцян жана Эл өкүлдөрүнүн бүткүл кытайлык жыйынынын туруктуу комитетинин төрагасы Ли Чжаньшу менен жолугушат. Визиттин жүрүшүндө эки тараптуу бир катар документтерге кол коюлары күтүлүүдө. Анын ичинде ар тараптуу стратегиялык өнөктөштүктү орнотуу жөнүндө Кыргыз Республикасы менен Кытай Эл Республикасынын ортосундагы биргелешкен декларация бар.

Андан соң Сооронбай Жээнбеков 9-10-июнда өтө турган ШКУга мүчө мамлекеттердин башчыларынын кеңешинин кезектеги жыйынына катышуу үчүн Циндао шаарына (КЭР) учуп кетет.

ШКУга мүчө мамлекеттердин башчыларынын Кеңешинин жыйынында Шанхай кызматташтык уюмунун мындан аркы өнүгүүсүнө тиешеси бар бир катар чечимдерди талкуулап, кабыл алуу, саясий, экономикалык, маданий-гуманитардык чөйрөлөрдөгү, ошондой эле коопсуздук жана тышкы байланыш жаатындагы документтерди бекитүү мерчемделген.

Саммитте кытай тарап ШКУга мүчө мамлекеттердин башчыларынын кеңешине төрагалыгын (2017-2018-жылдар) аяктап, аны 2018-2019-жылдарга Кыргыз мамлекетине өткөрүп берет.

Саммиттин алкагында Жээнбеков Тажикстандын президенти Эмомали Рахмон, Индиянын премьер-министри Нарендра Моди, Монголиянын президенти Халтмаагийн Баттулга менен эки тараптуу жолугушууларды өткөрөт.

Автор: Жамалидин Парманкулов