Пизадагы кыйшык мунара түздөлүп баштады

Италиянын башкы ажайып жайларынын бири, кыйшайып турган Пиза мунарасы түздөлүп баштады. Бул тууралуу окумуштууларга таянып, чет өлкөлүк басылмалар жазышты.

Маалыматтарга ылайык, 25 жыл ичинде мунара 4 сантиметрге түздөлдү.

Пиза мунарасы 12-кылымдын аягында курулуп жатканда куруучулар жер кыртышынын өзгөчөлүгүн эске албагандыктан, 5 жылдан кийин кыйшайып калган. Көрсө, пайдубал турган түштүк тарапта кум менен топурак жумшагыраак болгон.

1990-жылы мунара кулап кетүү коркунучунан улам жабылып, 1993-2001-жылдары адистерден турган эл аралык команда түздөтүү иштерин жүргүзгөн. Буга 200 миллион фунт стерлинг (дээрлик 18 миллиард сом) коротулган. Иштер 2001-жылдын 15-декабрында аяктап, Пиза мунарасы туристтер үчүн кайра ачылган. Бүгүнкү күндө эксперттер аны текшерип, абалын байкап турушат.

Айта кетсек, жыл сайын Пиза мунарасын көрүү үчүн 3,5 миллиондон ашуун турист келип турат.

Автор: Нургазы Аматов
Фото: Интернеттен алынган