Башкы прокуратура шайлоонун жүрүшүн көзөмөлдөйт. Бул тууралуу аталган мекеменин маалымат кызматынан билдиришти.
Ага ылайык, Башкы прокуратура төмөндөгү категориядагы жарандардын үгүт иштерин жүргүзүүгө жана ар кандай үгүт материалдарын чыгарууга жана жайылтууга укугу жок экендигин маалымдайт.
- мамлекеттик жарандык жана муниципалдык кызматкерлер;
- мамлекеттик саясий кызматтарды ээлеген адамдар;
- атайын мамлекеттик жана саясий муниципалдык кызматтарды ээлеген адамдар;
- шайлоо комиссияларынын мүчөлөрү;
- байкоочулар, эл аралык байкоочулар;
- диний ишмерлер;
- кайрымдуулук иштерин жүргүзгөн уюмдардын уюштуруучулары жана мүчөлөрү;
- 18 жашка чыга элек адамдар;
- чет өлкөлүк жарандар жана уюмдар;
- жарандыгы жоктор;
Шайлоо алдындагы үгүттөө кампаниясында төмөнкүлөргө тыюу салынат:
- улуттук, диний, аймактар аралык кастыкты;
- гендердик жана башка социалдык артыкчылыктарды басмырлоого;
- кастыкка чакырган үгүттөө;
- бийликти басып алууга;
- конституциялык түзүлүштү күч менен өзгөртүүгө;
- мамлекеттин бүтүндүгүн бузууга багытталган чакырыктарга;
- Шайлоочулардын добушун кандай түрдө болбосун сатып алууга.
"Кыргыз Республикасынын Коопсуздук кеңешинин 2020-жылдын 1-сентябрындагы чечимин аткаруу максатында Башкы прокуратура шайлоо мыйзамдарынын бузулушуна жол бербөө менен айрым талапкерлердин же саясий партиялардын кызыкчылыктарын көздөө максатында мамлекеттик жарандык жана муниципалдык кызматкерлердин, тең укуктуулукту бузуу менен административдик ресурстарды кызмат абалынан кыянаттык менен пайдалануусуна жана алардын шайлоо алдындагы үгүт иштерине катышуусун, ошондой эле коомдук-саясий кырдаалды туруксуздаштырууга багытталган көрүнүштөрдүн алдын алуу максатында жалпыга маалымдоо каражаттарына жана интернет-булактарына мониторинг жүргүзүп келүүдө.
Кыргыз Республикасынын Жогорку Кеңешинин депутаттарын шайлоого даярдануу мезгилинде 21 жарыя-макала изилденип, ички иштер органдарынын кароосуна жиберилген", - деп айтылат маалыматта.
Жалпысынан республика боюнча Кылмыштардын жана жоруктардын бирдиктүү реестрине 22 материал катталып, ички иштер органдары тарабынан каралып жатканы маалымдалат.
