Шайлоо-2020: КМШ өлкөлөрүнөн келген байкоочулар өлкөдөгү шайлоого мониторинг жасоого киришти

Борбордук шайлоо комиссиясында КМШ өлкөлөрүнөн келген байкоочулардын миссиясы менен жолугушуу өттү. Бул тууралуу мекеменин маалымат кызматынан билдиришти.

"Жолугушууга Шайлоо жана референдум өткөрүү боюнча борбордук шайлоо комиссиясынын төрайымы Нуржан Шайлдабекова катышты. Тараптар 2020-жылдын 4-октябрына дайындалган Жогорку Кеңешке депутаттарды шайлоого байланышкан маселелерди талкуулашты.

КМШ өлкөлөрүнөн келген байкоочулар алардын миссиясынын негизги максаты – боло турган шайлоонун улуттук мыйзамдарга шайкеш келишин жана эркин, демократиялуу шайлоо өтүшүнө байкоо жүргүзүү экендигин билдиришти. Миссиянын иши Кыргыз Республикасынын мыйзамдарына, шериктештиктин алкагында кабыл алынган документтерге ылайык жана шайлоо өткөрүүнү уюштуруу боюнча жалпы таанылган эл аралык принциптер менен эл аралык укуктун негизинде жүргүзүлөт", - деп айтылат маалыматта.

Маалым болгондой, 2020-жылдын 14-сентябрынан тарта миссиянын штабы шайлоого мониторинг жасоого киришти.

Автор: Бактыгүл Султаналиева