"Коррупция же искусство". Опера жана балет театрынын артисттери президентке кайрылуу жасашты

Бүгүн, 13-сентябрда Абдылас Малдыбаев атындагы Кыргыз улуттук академиялык опера жана балет театрынын артисттери маалымат жыйында президент Садыр Жапаровго кайрылуу жасашты.

Кайрылууда театр кызматкерлери менен жетекчиликтин ортосунда эмгек келишиминин жоктугунан улам бир топ кадрлардын жумуштан кетүүсү жана аларга карата куугунтуктоолор, кысымдар болуп жатканы айтылды.

"Урматтуу Садыр Нургожоевич, сиз 2021-жылдын 29-январында инсандын руханий жана адеп-ахлактык өнүгүүсүнө жана дене тарбиясы жөнүндө жарлыкка кол койгонсуз. Азыр Эмгек сиңирген артисттер, эл аралык сынактардын лауреаттары жана таланттуу музыканттар жогорку жетекчилик менен иштөөгө макул болбогондуктан, жумушсуз калышты. Ошондуктан опера жана балет театрынын көйгөйлөрүнө өзүнчө көңүл буруп, мекемелер аралык комиссия түзүүнү жана кадр маселесин чечүүгө жардам берүүңүздү суранабыз", - деп кайрылышты.

Ошондой эле балет бийчиси Керемет Болотбекованын айтымында, бул көйгөйлөр 6-марттан бери көтөрүлүп, Маданият, маалымат, спорт жана жаштар министрлигине, президенттин аппарат жетекчилигине жана Жогорку Кеңешке кайрылуулар болгон, бирок эч кандай татыктуу жооп болгон эмес.

Автор: Каныкей Амантаева
Фото: Каныкей Амантаева