Жалал-Абадда жана облуста мектептердин жетишсиздиги көптөн бери чечилбей келе жаткан маселе, бул жылдан жылга курчуп баратат. Калктын өсүшү жогору, имараттар эскирип, коммуникациялар иштебей калган.
Маселени тез арада чечүү зарыл, анткени 7 жылдан кийин социологдордун божомолунда биринчи класска жаңы келген окуучулардын үчтөн бир бөлүгүнө партада орун калбайт.
Билимдин сапаты төмөндөп жатат
Шаардык кеңештин депутаты Зарниса Шериева: “Бул көйгөй ар бир энени тынчсыздандырат. Ал эми биз, аялдар, шаардык кеңеште бул маселени дайыма көтөрүп келебиз. Мектептер толуп кеткендиктен балдар барган сайын начар окушат”, - деди.
Республикалык тестирлөөнүн жыйынтыгы боюнча, жыл сайын билим сапаты мектептердин жана алардагы мугалимдердин жетиштүү санынан түздөн-түз көз каранды экени байкалууда. Жыйынтыктар начарлап, бул облустук билим берүү башкармалыктарынын өкүлдөрүн тынчсыздандырып жатат.
Жалал-Абаддын жашоочусу Актан Сыранов: “Окуучулардын кантип отурганын билгиңер келеби? Бир партада үч окуучу отурат. Бир класста 50 окуучу болгону кадимкидей көрүнүш болуп калды. Мугалимден мындай класска кандай көңүл бурулат?”, – дейт.
Тилекке каршы, мектептердин жетишсиздигине байланыштуу мындан да курч көйгөйлөр бар.
Авариялык коркунуч
Облус боюнча 54 мектеп авариялык же чукул оңдоого муктаж деп табылды. 34 имаратка такыр окууга болбойт, ал тургай ал жакка балдарды киргизүү да мүмкүн эмес. 50 жана андан да көп жылдык эски имараттар бар, аларда капиталдык оңдоо иштери жүргүзүлө элек.
"Авариялык абалдагы мектептерде дагы деле шарттуу түрдө окуса болот, ал жакта эмне окутулат билесизби? Жарандык коргонуу, имараттардын кыйрашы учурундагы иш-аракеттер сымал окуулар жүргүзүлөт. Бардык сабактар балдарга ушундай кырсык болуп кетсе, кандай иш-аракет кылуу керектигин үйрөтүүгө арналган. Албетте, балдарды жок дегенде аман калууга, өзгөчө кырдаалда өзүн туура алып жүрүүгө үйрөтүлгөнү жакшы, бирок жалпысынан бул кайда пайдалуу? Балдардын башына чатыры кулап калуу коркунучу жок жаңы мектептер болушу керек. Андай эмеспи?” – деп суроо салды Актан Сыранов.
Бүгүнкү күнү мектеп жетишсиздиги жогору болгон – шаарда он чакты мектеп, облуста дагы 20 мектеп тез арада курулушу керек. Мындай маалыматты Билим берүү жана илим министрлигинен билдиришти.
Боз үйдө окуп жаткан балдар, үйүн сабак өтүү үчүн берген айыл тургундары, ашар жолу менен курулган имараттар – бул Жалал-Абад облусунан сюжет.
ГОРОНОнун адиси Шаирбек Эргешов: “Биз бул маселени ар бир ыңгайлуу учурда көтөрүп жатабыз. Авариялык мектептердин көптүгү, мектептердин жетишсиздиги – биздин түбөлүктүү жана туруктуу баш оорубуз”, - деди ал.
Жылыш бар, бирок дагы жылыш болуш керек
Жалал-Абад шаардык мэриясынын социалдык өнүктүрүү бөлүмүнүн башчысы Салтанат Алтынбекова: “Бул шаардагы эң орчундуу көйгөйлөрдүн бири. Жаңы мектептер абдан керек. Ал эми бул билим берүүнүн сапатына жакшы таасирин тийгизбейт, шаардын жетекчилиги маселенин олуттуулугун толук түшүнөт”, - деп кейиди.
Иш аткарылбай жатат деп айтууга болбойт. Пландарда Советтер Союзунун Баатыры Михаил Бабкин атындагы №1 мектеп-гимназиясынын окуу корпусу бар. Бир нече жыл мурун көптөн бери кыйналып келе жаткан №6 мектеп акыры курулуп бүтүп, бир убакта каржынын начардыгынан курулушу 2 жылга кечигип келсе, учурда 300гө жакын бала кадыресе шартта билим алууда.
Облус боюнча мектептер жыл сайын ачылып, Тогуз-Торо районунун Каргалык айыл аймагындагы орто мектептин имаратынын курулушу тездеди – ал жерде былтыр ноябрда авариялык деп табылган эски имарат өрт учурунда күйүп кеткен.
Бирок бул маселени чечүүнүн темпи жана артыкчылыктуу деңгээли жогору болушу керек. Социологдор менен Билим берүү жана илим министрлигинин адистери шаар менен облуста 7 жыл ичинде 40 жаңы мектеп пайда болбосо, кырдаал курчуйт деп эсептешет.
Бүткүл коомдун, саясий партиялардын, республикалык бийлик органдарынын катышуусусуз маселени чечүү мүмкүн эмес. Ал эми бир нече жылдан кийин ал натыйжалуу чечимге жетишсиз болуп калышы мүмкүн.
