Өзбекстан менен кызматташуу боюнча 28 документке кол коюу пландалууда

Өзбекстандын президенти Шавкат Мирзийоевдин Кыргызстанга мамлекеттик сапарынын алкагында жалпысынан 28 документке кол коюлары күтүлүүдө. Бул тууралуу министрлер кабинетинин төрагасынын орун басары Бакыт Төрөбаев коңшу өлкөнүн Инвестициялар, өнөр-жай жана соода министри Лазиз Кудратов менен жолугушусунда талкууланды.

“Өзбекстандын президенти башында турган делегацияны тосуп алууга жана эки тараптуу жолугушууларды жемиштүү уюштуруп өткөрүүгө дыкат даярдыктар көрүлүүдө. Өзгөчө соода-экономикалык жана инвестициялык кызматташтыкты кеңейтүү жана өнүктүрүү боюнча иштер жүрүүдө. Кыргызстан менен Өзбекстан мамлекеттери ортосундагы ар тараптуу бардык тармактар боюнча кызматташууларыбыз майнаптуу жыйынтыктарды бере берсин”,- деди Төрөбаев.

Маалыматка ылайык, сапарды утурлай Кыргыз-өзбек бизнес форуму да өтөт.

Өз учурунда Лазиз Кудратов эки мамлекеттин ишкер чөйрөлөрүнүн ортосундагы байланышты чыңдоого багытталган кыргыз-өзбек бизнес форуму жана эки өлкө лидерлеринин жолугушуусу жемиштүү болоруна ишенимин билдирди.

Өзбек президентинин мамлекеттик сапары 26-27-январга пландалып жатат.

Автор: Максуда Кудайбердиева
Фото: Министирлер кабинети