Нарында Ормон хандын 230 жылдык мааракеси белгиленет

Нарында Ормон Ниязбек уулунун 230 жылдык мааракеси өткөрүлөт. Бул тууралуу бүгүн, 20-сентябрда президенттин Нарын облусундагы ыйгарым укуктуу өкүлчүлүгүнөн билдиришти.

Маалым болгондой, иш-чара 2-октябрда Нарын облусунун Кочкор районунда уюштурулат. Мааракенин алкагында Семиз-Бел айылында Мамлекеттик Туу көтөрүлүп, Ормон Ниязбек уулунун эстелиги ачылат.

Иш-чаранын расмий бөлүгү Кочкор айылындагы стадиондо болсо, маданий бөлүгү “Ормон Хан” сейил багында уюштурулат. Ошондой эле улуттук ат оюндары Семиз-Бел айылындагы Орто-Токой аймагында өткөрүлөт.

Сарыбагыш уруусунун чоң манабы Ормон Ниязбек уулу 1792-жылы Чоң-Кемин өрөөнүндө туулган.

Тарыхый маалыматтарга караганда, анын жашоосу кыргыз урууларынын өз ара чыр-чатактары ырбаган, курчуган учурга туш келген. Отуз жашынан баштап эл башкарууга аралаша баштаган.

Анын атак-даңкы артып, кыргыз урууларынан баштап казактардын арасында дагы таасири күчөгөн. Анжиян, Алай, Ферганадагы аркалык кыргыз урууларынын башчылары Ормон хан менен алака катышта болуп турушкан.

Убагында казак ханы Кененсарыны жеңип бийлигин бекемдесе, Чүй жергесин душмандардан коргоп келген. Сырткы душмандарга каршы күрөшүп, даңкы Орусия, Кытай империяларына жеткен кыргыз ханы ички душмандардын колунан каза тапкан.