“Бул күнгө мен ички дүйнөм менен 10 жыл даярдандым”. Бишкекте ырчы Сагын Эргешовдун концерти өтүүдө

Бүгүн, 17-ноябрда борбор калаада эстрада ырчысы Сагын Эргешовдун эң алгачкы тушоо кесүү концерти өтүүдө. Студенттердин күнүнө карата уюштурулган иш-чара Кожомкул атындагы спорт сарайында орун алып, белгиленген убакыттан бир саатка кеч башталды.

Жаш ырчы Сагын Эргешов алгач сахнага “Сени сүйөм” аттуу репертуары менен бийчилердин коштоосунда чыкты. Көрүүчүлөр ырчыны дүрбүтө кол чаап тосуп алышты.

Сагын Эргешовду белгилүү ырчылар Алтынай Нарбаева, Самара Каримова, Кызсайкал Кабылова жана жубайлар Аваз Акимов, Айдана Дека куттуктап келип, ырчынын күйөрмандарына чыгармаларын тартуулашмакчы. Арасында үй-бүлөсү менен күйөрмандык кылып колдоп келгендери да бар.

“Сагын мага кесиптеш эмес, бир тууганымдай. Чыгармачылыкка чогуу аттандык. Сагын өтө күйүмдүү, кандай учур болбосун ага гана барчумун. Бир тууганым бүгүнкү концертин ийгиликтүү өткөрүп алсын”, - деди Кызсайкал Кабылова.

Концерттин жалпы чыгымы 18 миң долларды түздү.