Мындан ары абитуриенттер ЖОЖго тапшырганда кыргыз тилинен тест берет

Өлкөдө мындан ары жогорку окуу жайларына тапшырган абитуриенттер кыргыз тилинен милдеттүү түрдө тест тапшырат. Бул тууралуу Билим берүү жана илим министрлигинин басма сөз кызматынан билдирди.

Маалыматка караганда, тиешелүү буйрук 7-февралда чыккан. Ага ылайык мындай талап бардык окуу жайларына тиешелүү.

“Бул мамлекеттик тил боюнча тест абитуриенттин мамлекеттик тилди билүү деңгээлин аныктайт жана жогорку окуу жайларына тапшырууда сынактын жыйынтыгына таасирин тийгизбейт”, - деп айтылат билдирүүдө.

Эгерде абитуриент мамлекеттик тил боюнча тест тапшырбаса, анда жалпы республикалык тестирлөөнүн негизги жана предметтик тесттердин жыйынтыгы берилбейт.

Былтыр 17-июлда кабыл алынган “Кыргыз Республикасынын мамлекеттик тили жөнүндө” конституциялык мыйзам боюнча башталгыч, орто жана жогорку кесиптик билим берүү уюмдарында кирүү жана бүтүрүү экзамендери киргизилди.

Автор: Арууке Амирдинова