Кыргызстан жана Татарстан өз ара Маданият күндөрүн өткөрөт

Кыргызстан жана Татарстан 2024-2025-жылдары өз ара маданият күндөрүн өткөрөт. Бул тууралуу кечээ, 21-февралда президент Садыр Жапаров менен Татарстандын башчысы Рустам Миннихановдун жолугушуусу учурунда белгилүү болгонун мамлекет башчынын маалымат кызматы билдирет.

Маалымдалгандай, анда эки лидер эки өлкөнүн элдеринин ортосунда маданий алакаларды чыңдоо, спорт жана маданият жаатында тажрыйба алмашуунун маанилүүлүгү тууралуу бирдиктүү пикирлерин билдиришти.

Жолугушуу "Келечек оюндары" биринчи эл аралык мультиспорттук мелдешинин алкагында өттү.

Тараптар Кыргызстан жана Татарстандын ортосундагы эки жактуу кызматташтыкты тереңдетүүгө жана кеңейтүүгө тийиштүү маселелердин кеңири чөйрөсүн талкуулашты.

Эске салсак, президент Садыр Жапаров Орусияга болгон сапарынын алкагында кечээ күнү аталган өлкөнүн башчысы Владимир Путин менен жолугушкан.

Ушул эле күнү ал "Дуслык" ордени менен сыйланган. Сыйлыкты Татарстандын башчысы тапшырган.