"Төртөө алтын". Балбандар Түркияда өткөн мелдештен 18 медаль менен кайтышты

Өлкөнүн күрөш боюнча улуттук курама командасы байгелүү орундарга ээ болушту. Бул тууралуу бүгүн, 16-мартта Дене тарбия жана спорт департаментинен билдиришти.

Маалыматка ылайык, өспүрүмдөр курама командасы Түркиянын Анталия шаарында өткөн "Victory Cup 2024" эл аралык мелдешинде 4 алтын, 3 күмүш жана 11 коло медалга ээ болду.

"Эркин күрөш боюнча Садыр Кайыпбеков жана Асан Өмүрбек уулу алтын медалга татыды. Жакшылык Боробаев, Курсанбек Исаков, Айбек Эралиев, Марлен Абдраимов жана Адыл Табылдыев 3-орунду ээлешти.

Грек-рим күрөшү боюнча Нурмухамед Карагулов, Марлен Абдысаматов күмүш медалга, Ислам Темирбеков жана Акылбек Элжан уулу коло медалга ээ болушту", - деп жазылат анда.

Ал эми кыз-келиндер арасында Айжаркын Жаныбекова жана Акылай Чыныбаева алтын медаль алышты.

Азиза Шумкарова күмүш медалга ээ болуп, Айдеми Асанказиева, Асел Токтосун кызы, Асел Жапарова жана Меруерт Октябрева 3-орунду алышканы кабарланат.