"Көзүнө көрүнгөндү аткылап". Террорчулар "Крокус Ситиде" канча убакыт жүргөнү белгилүү болду

Москвадагы "Крокус Сити Холл" борборунда кыргын уюштурган террорчулар борбордо жалпы 13 мүнөт жүрүшкөн. Бул тууралуу Орусиянын Тергөө комитетинин башчысы Александр Бастрыкин Владимир Путин менен жолугушууда айтты.

Ал 22-мартта "Крокус Ситиге" Москва убактысы боюнча саат 19:54тө террорчулар келгенин билдирди. Бир нече мүнөттөн кийин, Москва убактысы боюнча 19:58де алар адамдарга ок чыгара башташкан.

"Алар көзүнө көрүнгөн бардык жарандарды аткылай берген", - деди Бастыркин.

Андан соң террорчулар желим бөтөлкөлөргө салынган бензинди колдонуп, имаратты өрттөп, саат 20:11де имараттан чыгып кетишкен. Бастыркиндин айтымында, алар унаа менен чыгып бара жатып катуу ылдамдыкта жөө жүргүнчүлөрдү, тагыраагы эки жаш баласы бар үй-бүлөнү сүзүп кетишкен.