Камчыбек Ташиев коррупцияга каршы күрөштө канча сумма түшкөнүн айтты

Улуттук коопсуздук мамлекеттик комитетинин төрагасы Камчыбек Ташиев телеканалдардын бирине маек берип, коррупцияга каршы жүрүп жаткан күрөштө өлкө бюджетине канча каражат түшкөнүн айтты.

"Коррупцияга каршы күрөштөн өндүрүлүп жаткан каражаттардын бир тыйыны да биздин мекемеде калбайт. Биздин андан бир тыйын да алып калганга укугубуз жок. Баары банктагы эсепке түшүп, түздөн түз республикалык казынага которулуп турат.

Жалпылап ушул күнгө чейин казынага түшкөн каражаттар жөнүндө тактоо киргизип коёюн. 20 миллиард сом дегениңиз бер жагы, бул эски маалымат. Бүгүнкү күндө накталай түрдө 40 миллиард сом каражат мамлекеттик бюджетке которулду. Эгерде биз мамлекетке толук өтүп бүтө элек акчалай, ошондой эле ар кандай кыймылсыз мүлк, мал, унаалар жана башка түрүндөгү кирешелерди эске алсак, акыркы үч жылда коррупцияга каршы күрөштөн түшүп жаткан сумма 100 миллиард сомдон ашып кетти. Сот иштери бүткөндөн кийин калган каражаттар да өндүрүлүп, түздөн-түз казынага барып түшөт", - деген Ташиев.

Эске салсак, буга чейин Финансы министрлиги мамлекетке коррупцияга каршы күрөшүүдөн 20 миллиард 445 миллион сом түшкөнүн маалымдаган.

Автор: Кылымбек Бейшеев