"Үйү өрттөнүп". Ноокенде киши өлтүрүүгө шектүү жаран кармалды

Ноокен районунда адам өлтүрүүгө шектүү жаран кармалды. Бул тууралуу Жалал-Абад облустук ички иштер башкармалыгы билдирди.

Милициянын маалыматына ылайык, 24-март күнү саат 22:00 чамасында Ноокен РИИБдин нөөмөт бөлүмүнө Ноокен райондук өрткө каршы кызматынын диспетчери аркылуу чакыруу түшкөн. Анда диспетчер ошол эле райондун Масы айылында жайгашкан көп кабаттуу үйдүн 4-кабатында өрт чыккандыгын билдирген.

Окуя болгон жерге Ноокен РИИБдин тергөө-ыкчам тобу барган учурда 69 жаштагы жарандын жансыз денеси табылып, анда жараты бар экендиги аныкталган.

Бул факты боюнча кылмыш-жаза кодексинин 130-беренеси (Ден соолукка оор залал келтирүү) менен катталып, кылмыш иши козголуп, тиешелүү соттук-медициналык экспертизалар дайындалган.

Жүргүзүлгөн иликтөө иш-чараларынын натыйжасында, кылмышка шектүү катары Базар-Коргон районунун 42 жаштагы тургуну Д.М. экендиги аныкталып, тергөө кызматына алынып келинген.

27-март күнү кылмыш ишине шектүү Ноокен райондук соту тарабынан 2 айга камакка алынган.

Учурда аталган кылмыш ишинин алкагында тергөө амалдары жүргүзүлүп жатат.