3 жашар кыздын өлүмү боюнча алгачкы сот отурумунда жаңжал чыгып, эмеректер талкаланды

Кечээ, 24-апрелде Бишкектин Октябрь райондук сотунда Бишкектеги жеке менчик клиникалардын биринде каза болгон үч жашар кыздын иши боюнча алдын ала соттук отурум өттү.

Алдын ала угуу аяктаган соң жабырлануучунун мыйзамдуу өкүлдөрү жана тарапташтары чыр-чатак чыгарып, соттун эмеректерин талкалашып, айыпталуучулар менен жактоочулар жаракат алганын Бишкек шаардык соту кабарлады.

"Бул факт боюнча Октябрь райондук соту, жабыркаган айыпкерлер жана башка тартаптар тиешелүү органга кайрылышты. Бишкек шаарынын Октябрь райондук соту бул чагымчыл жагдайды сот адилеттүүлүгүн жүзөгө ашырууга басым жасоо катары баалайт жана мындай жагдайларга жол берилбестигин эскертет", - деп билдиришти шаардык соттон.

Эске салсак, декабрдын аяк ченинде наристенин өлүмү тууралуу маалыматты адвокат Канат Хасанов социалдык тармактагы баракчасы аркылуу билдирген. Анда ата-энеси анын тишин тазалатканы стоматологияга алып барып, наркоз берилген соң көз жумганын айтышкан.

Мындан улам Саламаттыкты сактоо министрлиги бул окуя боюнча атайын комиссия түзүлгөнүн билдирип, клиника тергөө аяктаганга чейин убактылуу жабылган. Ал эми медициналык борбордун директору убактылуу иштен четтетилген.

Ошол эле учурда бул окуя боюнча Кылмыш-жаза кодексинин 146-беренесине ылайык кылмыш иши козголуп, бардык экспертизалар дайындалган.