Чолпон-Атада эл аралык марафон башталды (видео)

Бүгүн, 4-майда Чолпон-Ата шаарында “Run the Silk Road” эл аралык марафону старт алды. Ага 3 миңдей адам катышууда.

Иш-чаранын ачылышына министрлер кабинетинин төрагасынын орун басары Эдил Байсалов келип, катышуучуларга ийгилик каалады.

Дене тарбия жана спорт департаментинин директорунун орун басары Самат Токтоналиев аталган мелдешке 30 өлкөдөн 3 миңдей спортчу катышып жатканын айтты.

“Быйыл марафонго 30 мамлекеттен 3 миңдей спортчу катышууда. Мамлекет тарабынан иш-чараны уюштурууга 12 миллион сомдой каражат бөлүндү”, - деп билдирди Тыналиев.

Катышуучулар төмөнкү аралыкта чуркашат:

Марафон (42,195 чакырым);

Жарым марафон (21,097 чакырым);

10 чакырым (чуркоо жана скандинавиялык басуу) аралыктан старт алышат. Мындан тышкары 3 чакырым балдар жарышы.

Марафондун 42,2 чакырым жана 21,1 чакырым аралыктагы жеңүүчүлөрү үчүн байге фонду 1 миллион 544 миң сомду түзөт.

Эскерте кетсек, марафон - спортчулар үчүн Олимпиада оюндарында жолдомо алуу үчүн кошумча упай чогултуу мүмкүнчүлүгү.