Украиналык учкучсуз учактардын чабуулунан Белгород облусунда жети киши каза тапты

Бүгүн, 6-майдын таңында украиналык учкучсуз учактар Орусиянын Белгород облусунун Борисов районуна чабуул коюшту. Бул тууралуу чет элдик басылмалар жазды.

Маалыматтарга караганда, дрондордун соккусуна кабылган эки автобуста жети киши каза тапты, алардын экөө аял, бешөө эркек. Ошондой эле 35 киши жараат алган, алардын экөө балдар. Борисов райондук ооруканасында үч адамдын абалы өтө оор. Аларды Белгородго которууга даярдап жатышат.

Губернатор Вячеслав Гладковдун айтымында, кол салуу Березовка айылына жакын жерде болгон. Ал айнектери сынган автобустун сүрөтүн жарыялады. Анын айтымында, автобуста жергиликтүү "Агро-Белогорье" чочко фермасынын жумушчулары бара жаткан.

"Учурда Грайворонский жана Борисов атындагы чочко фермаларынын жети кызматкери каза болгону белгилүү. 15 жумушчу ар кандай оордуктагы жаракаттарды алышкан", - деп билдирген компания.

Соңку бир жылда Украина менен чектеш Белгород облусуна украин артиллериясы, учкучсуз учактары жана диверсант топтору бир нече жолу чабуул коюшкан. Кол салуулар көбөйүп жаткан маалда орус президенти Владимир Путин март айында Орусия Харьков аймагын буфердик аймакка айландырышы мүмкүн экенин айткан.

Киев Орусиянын аймагындагы жайкын тургундарды бутага алып жатканын четке кагууда. Украин бийлиги Орусияга сокку урууга укугу бар экенин айтып, аскердик буталар бутага алынып жатканын баса белгилешти.

5-майда Орусиянын куралдуу күчтөрү Украинанын Харьков жана Днепропетровск облустарына, ошондой эле Одессага чабуул койгон. Натыйжада кеминде үч жай тургун набыт болуп, ондогону жарадар болгон.

Автор: Бек Оморбеков