Михаил Мишустин баштаган Орусия өкмөтү отставкага кетти

Бүгүн, 7-майда Орусиянын премьер-министри Михаил Мишустин баштаган өкмөт отставкага кетти. Бул тууралуу чет элдик басылмалар жазышууда.

Орусиянын башкы мыйзамына ылайык, жаңы шайланган мамлекет башчынын инаугурациясынан кийин министрлер кабинети дароо тарашы керек.

"Михаил Мишустин жаңы шайланган президенттин кызматка киришүүсүнүн алдында өкмөттүн отставкасы тууралуу жарлыкка кол койду. Ага ылайык, өкмөт Конституциянын талаптарынын негизинде өз ыйгарым укуктарын токтотту", - деп айтылат өкмөттүн билдирүүсүндө.

Михаил Мишустин Мамлекеттик Думадагы баяндамасында мындан ары да жемиштүү кызматташууга даяр экенин, кадрдык чечимдер туура кабыл алынарына ишенерин билдиргени кошумчаланды.

Владимир Путин өкмөттү министрлер кабинетин кайра түзүү жол-жоболоруна байланыштуу улуттук өнүгүү максаттарынын үстүндө иштөөгө чакырды. Мамлекет башчы ошондой эле министрлер кабинетине КОВИД-19 пандемиясына каршы күрөштөгү мыкты иши жана экономиканы колдоо боюнча ийгиликтүү жумуштары үчүн ыраазычылык билдирди.

Жаңы министрлер кабинетин түзүү процесси жаңы премьер-министрдин дайындалышы менен башталат. Ал үчүн жаңы шайланган президент Мамлекеттик Думага премьер-министрдин талапкерлигин сунуштайт. Аны көрсөтүү үчүн ага президенттик кызматка киришкенден кийин эки жума убакыт берилет. Бирок бул убакыт аралыгында мурдагы министрлер кабинети өз милдеттерин аткарып турат.

Айрым жергиликтүү басылмалардын маалыматтарына караганда, эксперттер министрлер кабинетинин жаңы курамын дайындоо жаңы жобого ылайык ишке ашарын айтышууда.

Орусиялык саясатчы Алексей Макаркин болсо министрлер кабинетинин отставкасы өлкөгө жаңы президент шайлангандан кийин милдеттүү түрдө аткарыла турган чара экенин, ал өкмөттүн ишинин жыйынтыгынан жана анын натыйжалуулугунан көз каранды эмес экенин айткан.

Автор: Арууке Амирдинова